!مرحباً بكم في مطبخي 

أنا هيفا زيتون من فلسطين. الطبخ عندي مش مجرد خضار مفرومة وطنجرة على النار. هو محبتي لعيلتي وبيتي وانبساطي بكل شيء جديد وقديم بعمله في مطبخي. وأكتر من هيك هوه الحب والسعادة اللي بشوفها بعيون عيلتي، زوجي واولادي، وضيوفي من اهل واصدقاء لما ياكلوا اكلة أو حلويات من شغلي.

طاولة السفرة بتجمع العيلة. لسا في مخيلتي وقت ما كنت صغيرة في بيتنا بالخليل كيف كنا نلتم أنا واخوتي والعيلة حولين الطاولة مبسوطين ويحكي كل واحد فينا كيف كان يومه. ولليوم طاولة السفرة بتجمعني أنا وعيلتي.

بتمنى من خلال مدونتي أقدر أقدم لكم الاكلات بطريقة سهلة عشان تجربوها. راح أحاول أدون جميع الاكلات اللي بعملها، منها الشعبيه القديمه، والأطباق الفلسطينية اللي بنعتبرها من ألذ الاطباق، والحلويات والمعجنات.

بتمنى تضل هالمدونة ذكرى مني لكل من قرأ ويا رب اللي بيقرأ يستفيد من الوصفات لاني بكون سعيده لما حدا يجرب وصفة ويكون مبسوط فيها.
زوجي واولادي حبايبي تحملوا كتير من التجارب وكانوا بتقبلوا كل انواع الاكل، وبنفس الوقت كانوا ناقدين شطورين! بشكرهم لانهم دعموني وشجعوني وكمان ساعدوني أقدم هالمدونة. وكمان بشكر كل الأصدقاء اللي دايماً بشجعوني وكل المتابعين.